Bilo Papa Bongih

Asyik2 mama jo yang buek entry kan. Kali ni meh papa pulak yang nak membebel sikit. Bukan bongih, tapi ngoba an...sajo jo nak share dongan ekau sumo satu tragedi nih...dasat la jugak...cubo korang bayangkannnnnn....

Ekau sumo semasing ado tompek motong kan? Den tak kigho lah kek mano ekau motong. Ngan cino ko...gomen ko...tapi bilo motong tu, ekau motong lah boto2. Tak kesah la doh kalau ekau nak bertenet ko apo.. Janji kojo ekau siapkan lah yo tak?


Ok. ekau start motong kol brapo? Kol smilan? ko kol lapan? Haa...tak kesah la. tapi kalau ekau start motong kol smilan, ekau kono toreh pisau motong tu topek2 kol smilan ko? Tak pon laei seminit kol smilan??? Kalau camtu lah perangai ekau, ekau ghaso bos korang bhogri ko bonus bilo smpi maso eh?? ekau tak yah la yo berhaghap yang bos ekau tu nak bagi bonus ko, apo ko...ghonti an lah yo...haha....den ngoba an bondo yang boto nih, sobab apo? ok kito sambung....


Ekau poei motong dah la lambek. Tu satu hal, lopeh tu ekau belasah lenggang kangkung mak limah plak bilo bejalan tu. Bejalan dah la macam oghang dalam pantang atau pon oghang tuo2 koba itik pulang potang... Tergodik2 den nengok eh, nak bancuh air lah, nak makan roti lah. Pastu baru ekau nak bukak suis kompiuta tuh. Eh, den nak nanyo nih, ekau dibayar gaji untuk brekpes sekali ko?



Tu satu hal.Baru start motong bak kato oghang duduk tak sampai paneh punggung, ekau ngup ngap lagi. Dah tu, colah mano yo ekau buek kojo tu? Bilo bos panggil ekau buek kojo. Ekau masuk ambik tugasan. Ekau keluar semulo. Mengadap ntah hapo. Sampai maso bos ekau nak, ohh...lupo nak buek..tak siap laei bos, ado problem ni. Bilo dateline sampai, lambek siap. Ekau salah an problem yang ado. tapi ado ekau cubo selesaikan problem tu? Tak do eh. Ekau buek dek jo ado lah. Alasan eh, bukan kampeni den. Buek apo den peduli.


Menjolang tongahari. Oghang klua makan, ekau tak. Konon dayet la. Ok, den tak kesah la. Poghut ekau, bukan poghut den. Yang den kesah tu...bilo time oghang dah masuk nak sambung motong ni, ekau pulak baru lah nak melenggang masuk pantry, buek air nak minam lah, cari biskut mayat lah. Konon lapar, nak aleh poghut tu. Den nengok pon berbulu yo mato ni haa... Den bukan apo, nanti bilo bos tanyo ekau mano, tak kan den nak kato ekau baghu nak mengaleh poghut? Kang ekau koba an den tak kaber line pulak!



Adoi la. Insaf2 lah. Cemano den nak promot ekau kek bos bagi ekau naik gaji, dapek bonus..kalau macam ni lah cagho eh ekau motong? kalau tragedi nih berlaku la kek korang, apo korang nak buek yo?